បន្ទាយមានជ័យ៖ លោកឧបនាយករដ្ឋមន្ត្រី កែ គឹមយ៉ាន បានចូលរួមបោះឆ្នោតនៅមណ្ឌលសាលាបឋមសិក្សាគោរដ្ឋាន សង្កាត់អូរអំបិល។ លោកបានលើកឡើងថា ការបោះឆ្នោតពិតជាមានសារៈសំខាន់បំផុតសម្រាប់ប្រទេសជាតិ ក៏ដូចសម្រាប់ការអភិវឌ្ឍឃុំ-សង្កាត់នីមួយៗ ដែលពលរដ្ឋជាម្ចាស់សន្លឹកឆ្នោតត្រូវចូលរួមបោះឆ្នោតឱ្យបានគ្រប់ៗគ្នា។

ដំណើរការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដំណើរការយ៉ាងរលូនមិនមានបាតុភាពបង្កនូវអសន្តិសុខណាមួយកើតមានឡើយ។ គ្រប់ការិយាល័យបោះឆ្នោត ដោយមានការការពារសន្តិសុខ សណ្ឋាប់ធ្នាប់យ៉ាងល្អប្រប្រសើរ។ ដោយឡែកនៅក្នុងការិយាល័យបោះឆ្នោតទៀតសោតក៏មានភ្នាក់សង្កេតការជាតិ អន្តរជាតិ អ្នកសង្កេតការណ៍ មកពីគណបក្សនយោបាយ បានចូលរួមសង្កេតការផងដែរ។

ដំណើរការឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ បានចាប់ផ្ដើមនៅទូទាំងប្រទេសកម្ពុជា នៅម៉ោង៧ព្រឹកថ្ងៃអាទិត្យ ទី៥ ខែឧសភានេះ ក្នុងនោះខេត្តបន្ទាយមានជ័យមានការិយាល័យបោះឆ្នោតសរុប ១១១៤ ការិយាល័យ។

យោងតាមរបាយការដែលអង្គភាព EAC News ប្រចាំខេត្តបន្ទាយមានជ័យទទួលបានពីគណៈកម្មការ ជាតិរៀបចំការបោះឆ្នោត (គ.ជ.ប) ខេត្តបន្ទាយមានជ័យបានឱ្យដឹងថានៅទូទាំងខេត្តមាន ៩ក្រុង-ស្រុក មាន ៦៧ឃុំ-សង្កាត់ មានការិយាល័យបោះឆ្នោតសរុបមានចំនួន ១ ១១៤ការិយាល័យ។ ពលរដ្ឋមានឈ្មោះក្នុងបញ្ជីបោះឆ្នោតឆ្នាំ២០២១ សរុបចំនួន ៤០៥ ៧៣០នាក់។ ដោយឡែកគណបក្សនយោបាយដែលបានចូលរួមប្រកួតប្រជែងនៅក្នុងខេត្តបន្ទាយមានជ័យមានចំនួន ១១ គណបក្សនយោបាយ ក្នុងចំណោមគណបក្សនយោបាយទាំង ១៧ គណបក្សនយោបាយ នៅទូទាំងប្រទេសកម្ពុជា៕ 

^{PHOTO: ROEUNG CHANTREA}